503 ἰὼ πατρῷον οὖδας ᾿Αργείας χθονός,
504 δεκάτῳ σε φέγγει τῷδ᾿ ἀφικόμην ἔτους,
505 πολλῶν ῥαγεισῶν ἐλπίδων μιᾶς τυχών.
506 οὐ γάρ ποτ᾿ ηὔχουν τῇδ᾿ ἐν ᾿Αργείᾳ χθονὶ
507 θανὼν μεθέξειν φιλτάτου τάφου μέρος.
508 νῦν χαῖρε μὲν χθών, χαῖρε δ᾿ ἡλίου φάος,
509 ὕπατός τε χώρας Ζεύς, ὁ Πύθιός τ᾿ ἄναξ,
510 τόξοις ἰάπτων μηκέτ᾿ εἰς ἡμᾶς βέλη·
511 ἅλις παρὰ Σκάμανδρον ἦσθ᾿ ἀνάρσιος,
512 νῦν δ᾿ αὖτε σωτὴρ ἴσθι καὶ παιώνιος,
513 ἄναξ ῎Απολλον. τούς τ᾿ ἀγωνίους θεοὺς
514 πάντας προσαυδῶ, τόν τ᾿ ἐμὸν τιμάορον
515 ῾Ερμῆν, φίλον κήρυκα, κηρύκων σέβας,
516 ἥρως τε τοὺς πέμψαντας, εὐμενεῖς πάλιν
517 στρατὸν δέχεσθαι τὸν λελειμμένον δορός.
518 ἰὼ μέλαθρα βασιλέων, φίλαι στέγαι,
519 σεμνοί τε θᾶκοι, δαίμονές τ᾿ ἀντήλιοι,
520 εἴ που πάλαι, φαιδροῖσι τοισίδ᾿ ὄμμασι
521 δέξασθε κόσμῳ βασιλέα πολλῷ χρόνῳ.
522 ἥκει γὰρ ὑμῖν φῶς ἐν εὐφρόνῃ φέρων
523 καὶ τοῖσδ᾿ ἅπασι κοινὸν ᾿Αγαμέμνων ἄναξ.
524 ἀλλ᾿ εὖ νιν ἀσπάσασθε, καὶ γὰρ οὖν πρέπει,
525 Τροίαν κατασκάψαντα τοῦ δικηφόρου
526 Διὸς μακέλλῃ, τῇ κατείργασται πέδον.
528 καὶ σπέρμα πάσης ἐξαπόλλυται χθονός.
529 τοιόνδε Τροίᾳ περιβαλὼν ζευκτήριον
530 ἄναξ ᾿Ατρείδης πρέσβυς, εὐδαίμων ἀνήρ,
531 ἥκει, τίεσθαι δ᾿ ἀξιώτατος βροτῶν
532 τῶν νῦν· Πάρις γὰρ οὔτε συντελὴς πόλις
533 ἐξεύχεται τὸ δρᾶμα τοῦ πάθους πλέον.
534 ὀφλὼν γὰρ ἁρπαγῆς τε καὶ κλοπῆς δίκην
535 τοῦ ῥυσίου θ᾿ ἥμαρτε καὶ πανώλεθρον
536 αὐτόχθονον πατρῷον ἔθρισεν δόμον.
537 διπλᾶ δ᾿ ἔτεισαν Πριαμίδαι θἀμάρτια.